燦爛的遺產

好耐冇睇過韓劇。啱啱喺Netflix睇完廿八集「燦爛的遺產」（英文喺Shining Inheritance 或Brilliant Legacy)。好睇。係繼「藍色生色戀」後另一齣鍾意嘅韓劇。（「大長今」都好不過長咁啲。）

劇情方面都係熟口熟面：Cinderella story、奸後母、四角戀愛、爭家產，諸如此類。咁點解都話好睇呢？主要原因有四：男女角順眼、多位演員好演技、劇本節奏好、導演分場及鏡頭處理得好。另外，主題音樂及幾首插曲亦好聽。服裝靚得嚟又冇Boys Over Flowers - 韓版四葉草（台日韓三個版本中最好嘅版本，by the way）咁誇張。

劇情就唔好喺度講，有興趣就自己睇。祇想話編劇好細密，好多伏線寫得好好，兼且冇乜反駁位，有幾個位開頭覺得牽強後來都有合理解釋，唔似無線啲劇集咁當觀眾儍嘅，睇到你真係發炇增，人都癲。

先講四個男女主角：

韓孝珠 - 樣貌似宋慧喬果類靚，唔算美豔但係順眼好舒服果挺。山口百惠加李麗珍夾些少容祖兒（更係講佢哋後生果時啦）。身型高瘦似鍾嘉欣所以著衫靚。做戲方面，始終韓劇演員演譯比中港日演員較誇張，但係佢唔會令人覺得太作狀。佢好多細膩位如眼神小動作都好恰當。笑容更係殺死人。期待日後有機會睇佢嘅「同伊」。

李昇基 - 開頭心諗「下，搵呢條友做男主角，咁樣衰？」真係想質佢幾槌果隻。後來反而覺得選角一流，一路睇一路接受多啲，到後來仲幾Q𠻹，吹漲！身型高瘦著衫靚兼唱幾首插曲都好聽，原來係歌手出身。

裴秀彬 - 可能係喺北京電影大學畢業，所以演技似中港演員多過韓國演員，好自然。另一高大威猛之人，唔睇佢除衫果場戲唔知咁大隻，極man。

文彩元 - 開頭覺得佢嫲嫲，不過後來換咗新髮型就順眼好多。角色好難演夾難討好，但係睇得出佢用心演。我覺得編劇寫得呢個全劇最悲劇嘅角色唔錯，真係睇到你又嬲佢又可憐佢。最尾一集的一場天台戲証明咗佢嘅演技出色。

跟住要提幾個好出色嘅演員：

潘曉靜 - 另我諗起「溏心風暴」嘅李司棋。四個字講哂：爐火純青。

金美淑 - 大奸角唔易演，但係佢叻在冇過火。內心戲交得好足。唔知點解好想睇汪明荃點做呢個角色。

延俊錫 - 雖然佢拍此劇時祇得14歲，卻係我睇過咁多演自閉症嘅角色最好嘅一個。演得好穩。

一句講晒，如果你鍾意睇日韓劇嘅話，我誠意推介此劇。